شبكة رواسي نجد الأدبية - عرض مشاركة واحدة - خلف بن هذال

27-09-2014, 11:53 PM

يابنت ياللي تطوي الثوب الارداف
شط الحـوار بـدر بكـر يميحـه
في متلع ٍ عشبه تغريـف تغريـاف
وامـه هجـل ماشملوهـا منيحـه
والعنق عنق مذير ٍ عقب ما شاف
بـواردي ٍ لا قـف ٍ لـه بضيحـه
والعين عين موحش ٍ براس مشراف
يملا عيونـه بالفجـوج الفسيحـه
يابنت مانرضى المهونه والاضعاف
لنا على روس المشاريف صيحـه
لاتنشدين عن المنازل والأسـلاف
يوم أذكر الماضي تهيـج القريحـه
فينا صفات الطيب يابنت الاوصاف
ماتنطبـق فـي غيرنـا يامليحـه
لنا مكان ودين وسلـوم وأعـراف
بيـن القبايـل كاسبيـن المديحـه
شيمه وقيمه بيت معروف ونصاف
تاريخنا يحكـي لغتنـا الفصيحـه
دخلينا يرقد وراء الوجه ما خـاف
يامن وتحمـاه السلـوم الصريحـه
ناسم عصاه ولويبا حـد واطـاف
تحت الحما مـا واحـد ٍ يستبيحـه
ونفوسنا دايم عفيفـات وانظـاف
وابداننا من كـل علـه صحيحـه
صاحين صافين المشاريب واشراف
ماناكـل المتـرديـه والنطيـحـه
وصلبين في وقت الشدايد وعراف
منا المشوره واختيـار النصيحـه
وان ثارت الهيجالنا وسط واطراف
وجه الحريـب نقنعـه بالفضيحـه
واكرام لو يلحق بنا نقص وخـلاف
نملا الصحـن ونلحفـه بالذبيحـه
يوم السنين الماضيه حيل وعجاف
ينقر لنا من هبـة الريـح ريحـه
والعيشه اللي تدبل الكبـد تنعـاف
النفس عن ما تكرهـه مستريحـه
دنيا تموج ولا رسمنا لها اهـداف
ياما تحتهـا مـن فعـول ٍ قبيحـه
تجهز الغازي وتسـرع بالانكـاف
ولا تنكـف إلا بالفلـس والقبيحـه

,

صح الله لسان الشاعر

خلف بن هذال

ويسلم ذوقك واحساسك الراقي

انتقاء جميل بجمال وروعة حضورك

تقديري لك

النجلاء