يا راكب اللي ما دخل فالصيانه = ولا ساقه الهندي لبنده و كرفور
وما شغلّه ورعن براسه شطانه = ورعٍ على التفحيط ميّت ومقهور
عليه قرمٍ من صتايم زمانه = طليق وجه وللمواجيب مذخور
من لابة الروقه وسيعٍ بطانه = مع سرعته يسمع حبيب ومستور
روقي ومن طلحه وراعي مكانَه = ومنصاه للروقه قبل طلعة النور
ينصى الهواوي والتحيات امانه = ويحبّ راس اللي على الطيب مخبور
ناصر جزيل الهرج ينقى إسمانه = ما قطّ ورّدها على العِمِي والعُور
قل له ترى قلبي مخلّص ضمانه = واخاف لاتفتِِق تيازيره الحُور
قناتنا تعرض لميس وجمانه = وانا على التلفاز مغرم ومجبور
وابليس يعزف فالمحاني كمانه = وماعاد ينفعني محامي ودكتور
و اسمح لنا ياشيخ بعض الميانه = ما خاب من يطلب من الشايب الشور

ياراكب اللي تو وقِع ضمانه=في ربع مليون ودفعها على الفور
فاكس ار صدره ما خثع بالطمانه=وعليه من مزحم شلاقي وممرور
عزيز نفس ولا يحب الاهانه=فكره ذكي والراس صاحي ومسطور
منصاه ابو مشعل امبين مكانه=بيته امشيد للنشاما ومخبور
ان قلت وينه كل احد قال عانه=ماهو عن اللافي مخبى ومستور
ان وافق لسانه لما في جنَانه= عليِّ امانه لا اسحبه عند دكتور
واقول بالله صنِّفه باي خانه=يفرح شعور بقوله ويجرح شعور
حتيش لو لاميس والبرتكانه=شعت بنور وجيههن لا انطفى النور
زينات مظهر والبلى( بالبطانه)=مار استمع لي كان لي تقبل الشور
ولا ودي اسمع منك ياليلدانه=ما دامني مغضي وراضي ومسرور
من الكبر صاير بقلبك ليانه=وخابرك من عامين والقلب معصور
وعلى ابليس من الله الاستعانه=اللي خلق ذاك الملك نافخ الصور