الله على ارضً ربيع وتنعش ازهوره = ارضً عزيزه خبيث الطبع ما جاها
مع شبّت النار والحطبان مزبوره = وفي كترها الدله الصفراء ومصفاها
على اول البرد مقفيّه وممطوره = والارض خضراء يسر العين مرعاها
نصف الشهر والقمر متكاملً نوره = وزهور فاحت بعد جا السيل وارواها
ما عندك الا الرجال وكلاً ودوره = اللي على اللازمه كلاً تمناها
من خيرة الناس ما هي ناس مكبوره = المرجله رمزها والطيب مبداها
ناسً على الوافيه كلاً ومقدوره = يتعب وراها وياصلها وينخاها
ما هو من اللي لــحضر ايضرك حضوره = من زمرة الكذب والنمّه وشرواها
عن فعل قوم الشكاله تقصر شبوره = ولا به حلايا لا جيت اوصف حلاياها
ما ودي الا رجالً تنّقل الصوره = عن الاصاله ومنبعها ومعناها
نعوّض الصيف والمقياض واحروره = ونعوّض ايام مرت ماغتنمناها
الليل ربعي ياربعي والامر شوره = ركايب الفكر كلاً يدرج اخطاها
الهم اشوفه بصدري فاحت قدوره = محرق معاليق كبدي وافسد اعضاها
والفكر عزّم وشيّد باقي قصوره= والضيقه اليوم صار القلب مرساها
من حر ما بي سبحت الشعر وبحوره = وانظم واسجّل بعرفي واخذ احلاها
تكفون حالي من الروتين مقهوره = العزله اليوم لا نصبح ضحاياها
نقضي عليها ما دام تغازل البوره = وسيف الموادع نحطه فوق علباها
وش يمنع الشخص دام الحال ميسوره = نفّه عن الروح قبل يحل منهاها