اسندت هذه القصيدة للأخ الشاعر

ناصر بن عبيد السيحاني

لوحة مفاتيح الجهاز إلهن اسرار = حلّت عن الأقلام في كل حالي
وكل الاصابع معهن يمين ويسار = تختار منها كل حرف(ن) مثالي
بنات فكري كلهن قحّص مهار = سمعن عزاوي مكرمين السبالي
صالن وجالن معركة ماش مضمار =فرّه وكرّه يلحقن التوالي
في صوغ قاف الشعر نستزل اشعار = عن هزلهن نختار صوغ الجزالي
واستدرجت من فكر همال الامطار = و يسيل وادي قاف ما قط سالي
و اسند قوافي الشعر جزلات وخيار = للشاعر اللي في القسى ما يبالي
يا ناصر ابن عبيد يوم الفلك دار = واستنزفت عمر , الليال الخوالي
مر(ن) بسجات الوطى ديار وقفار = قامة وشدّة والسفر باعتجالي
ما به ديار الا بها رسم تذكار = تطري ليا ذعذع هبوب الشمالي
ويا كم وصلنا من بعيدات الأمصار = لو في سماهن ما لمثلي ظلالي
نطرد ورى الدنيا ونستعلم ديار = و نسابق احداث الزمن والليالي
و تنبه الغافل و طال به مشوار = و لجلج صدى الونه بصدرٍ هلالي
و عاينت و ليا البحر ما معه معبار = ولديت وليا البر والدار خالي
و صديت ما ودي بصلفات الافكار = و اعذل على نفسي ولا نيب سالي
و الشيب من عصر الصبا يطلب الثار = يوم الصبا قفى و شد الرحالي
لو كل ذكرى فيه ما ناشها العار = كيف انطوى طوي الرشاء بالمحالي
و يا ما انطوت صفحاته بناس ٍ ابرار = فيهم صفاة(ن) قاربت للزوالي

وقد شرفني بهذا الرد

:)

البارحة كني غريبٍ عن الدار=بين العرب جالس وحيدٍ لحالي
اسوج كن الراس جا فيه دوار=شفت القصيد وكل شيٍ طرالي
والجفن عارض زيلة النوم بإنكار=ماعاد يبغى النوم للسهر مالي
ودكت هواجيسي هميمات واكثار=لهن براسي من عصير اجتوالي
وبنات فكري جن غريبات الاطوار=سون الشخصية سواي انتحالي
قالن نجاري من بالاشعار بيطار=(ابو فلاح)وقلت ياهملالي
ساق الجوا ما قط جا مثل سنجار=رجمٍ قصير وذاك مزموم عالي
يامرحبا عرفان واجلال واكبار=للي بقافة بعد ما انحى نحالي
ترحيبةٍ تحمل شذا ريحة ازهار=روضٍ قفر نبته من الوسم مالي
شهر يساقيها من الديم مدرار=الماء من الحجّر تخرم وسالي
غنى ذبابه واختلف فيه نوار=وقت الاصيل اتقول معرض زوالي
كديميس انا مثلك من الوقت محتار=ماعاد للماضي بسوقه مجالي
وقتٍ تغير صار به للثعل كار=واد السباع يحوم به ما يبالي
واليوم اشوف ان الفلك فيه مندار=كل التواقيت اصبحت بالزوالي
وتبدلت عج وعواصيف وغبار=من عقب ما وبل الغمام امتوالي
فالبحر لاترمي بنفسك للاخطار=سج القدم مع مجرهد السهالي
وقيّس صحاصيح الجزيرة بالامتار=وربك يبدل كل حالٍ بحالي
ولا استحكمت والا عليك الزمن جار=عنز على من هو يسوق الخيالي
ويحيي موات الحزم من غب الامطار=مجيب من يدعيه جزل النوالي
وانا تراي اجهل بخافيت الاسرار=وما هس من قولي تتمه فعالي
وسلم على كل السياحين الاخيار=واختص من هو لك عزيزٍ موالي