شبكة رواسي نجد الأدبية

بسم اللي تتم بقدرته دورة الافلاك
ما بالكون كله تحت حكمه وتدبيره

وبعدها السلام ورحمة الله لمن لفاك
ياعلي بن نايف من هل البر والديره

لكن جاء بتفكيري وفكري صخب وحراك
لفت به ملاقيف الهواجيس وتثيره

تقول انت هــ الايام ما شفت كثر حكاك
تفرك لولب افكارك من العصر وتديره

قليل السوالف بان لك والبعض يخفاك
مع ان الكثير يكون بــ ابهامها خيره

لكن مجلسٍ ماهو كهذا ولا هذاك
تحير العقول لويش فرشه وتكبيره

ينشد صاحبه يقول لي كم سنه ما جاك
من يشوفني؟ ويقول له فضها سيره

باب الجود فيه اهدار للمال واستهلاك
والله قد نهى عن كثر هدره وتبذيره

رد المجلس ان البخل ناهي عنه مولاك
وسفانه كرم حاتم لها تم تجييره

عليك الحجج قامت وجاء القول في مرماك
بخلك لا تحاول يابن الاجواد تبريره