شبكة رواسي نجد الأدبية - مساجلات خفيفه من جيرانكم بسجن القوافي

كديميس

الطير غرد على غصن الهوى والغرام
و حمامة الدوح تشعى القلب بلحونها

و بنت القريحة تبجح ما عليها ملام
تلعب طرب لا لقت ناسٌ يلاحونها

ناصر يذكرني الماضي و عنده كلام
و الشاعره نجد بابداعات مخزونها

مما يخطون عاد القاف للانتقام
من عين شعري بعد ما كحلت نونها

" " " "
لهواوي

ازكى تحيه بريح الورد بعد السلام
لقريحة الشيخ من هاجوس ممنونها

من عاش بالذكريات الماضيه ما يلام
لو يصهره حر ليلاها ومجنونها

يحول بين العيون وزول ليلى عسام
في حالةٍ مذهله(غشوه)يسمونها

يقال بخشوم عشاق الغواني عِرام
مع هبت النود رياهن يشمونها

وختامها صح كلك بالوفا والتمام
بسبكك وحبكك لمعناها ومضمونه

شاعرة نجد

ياروعة الشعر واسلم واستلم ياسلام
من جزل الابيات والا عذب مكنونها

بسجن القوافي ليا جتنا على مايرام
صفت حروف القصيد وهزت مْتونها

مابين عشق وغرام وبين هم وهيام
والناس كلٍ على جرحه يغنونها

حمام مع وافر التقدير والاحترام
متّع بعذب اللحون اللي يحبونها

خل القريحه تولّع في هشيم العظام
اللي براها الهوى من بُعد مضنونها

كديميس

ساقيت زرع القوافي لين صار انسجام
و ولعت من مفردة والقاف غليونها

ءجنونهم حضّروا عندي و قلت الهمام
لا تطفي انوار سجن القاف و حصونها

يا زين جُن القوافي في دجيّ الظلام
تنفض غبار السنين اللي بُهت لونها

و يازين شوف الديار ليا سقاها الغمام
و صافِ النوايا مبادينا و ديدونها

لو ان عظمي هشيم ولا تبعت الجهام
من صغر سني و نضم الشعر لعيونها
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
الهواوي
دام المجال متوفر والعطا مستدام
وقوع المحيطات للولو يغوصونها

سباح انا محترف فـ البحر طبح وعام
ما يرعبه مفترس قرشه ولا نونها

لو الذهب كونته الشاعره من كلام

وبالفضه الشاعر اغرق من يبيعونها

لجيب الالماس ملفوفٍ بريش النعام
ليا طرت لي حواجب ذيك وعيونها

لمنطوقها يفطر اللي عاقدٍ له صيام
لكن يقول الضحى ياحمض ليمونها

[/color]