شبكة رواسي نجد الأدبية - ابك حنا الاد روق اهل التواريخ الوكيده ( رابط الشيله تحت القصيدة اتمنا الدعم )

يا هــلا بـرســالـةً جـتـنـي بها اخباراً سعيده
من نسيـبـي كـاسـب النوماس بافعالاً جزيله

قـال يـا بـشـراك جــاك اللـــي تمنيت وتريده
جـاك ذيـبـاً يـرتـكـي للـحـمـل ويروم الطويله

وانت سمه قلت واسمه نايف ونايف عضيده
خاله اللي يحتمي في الضيق من دون القبيله

الـحـزام اللــي الـيـا جـات المواقيف الشديده
فـي وقـوفـه كل شـامـخ بالرواسي ينحني له

جعل ياخـذ من خـوالـه طنخة الراس الفريده
وجعل ياخـذ من عـمـامه عـزة النفس الجليله

جعل ماينقص مع اهل الطيب والطاله رصيده
ولا يخيب ظن من هو في الشدايد يحتمي له

ابـنـي اللـي مع وصـولـه ذاب همي في جليده
نور عـيـنـي جـعـل شـانه فوق شان الاد جيله

الـسطـر يـطـنـخ براسـه والـحـمـيـا في وريده
وان تـعـزويـتـه بـحمـلاً هـد حـيـلـي يرتكي له

يا عسا الله يـجـعـلـه بـعـد النبي صفوة عبيده
يحتمي نـهــج الـرسـول ولا يـفـرط في دخيله

ويحفظ كتاب الولي بالروح من راعي المكيده
وان طغا الـطـاغـي يـرده بالـمـراهيف الصقيله

ما يخالف سـلـم روق اصحاب الامجاد التليده
عـزوتـه مـن عــمــه وخــالـه ودرعن يلتجي له

من ذوي اثبيت ابـوه اللي خـذا التاريخ بـ ايده
ومن ذوي حـمـاد خــالـه راعـي الـكـف الجزيله

بالـسـمـؤ عـمـه يـفـيـده وبالفـخـر خـالـه يفيده
في خـوالـه في عـمـامــه ياصل المجد ويشيله

ابك دام ان روق ســاســه بالفخر محدن يزيده
شـامـخ وعـاذلـه يـمـسـي في وسط كبده مليله

ابـك حــنــا الاد روق اهـــل الـتـواريـخ الوكيده
مـن يـخـاويـنـا يـعــيــش ومــن يـعـاديـنـا نزيله

ابك حـتـى الـرجـم مـن جينا على الدنيا نسيده
نـحـكـمه حـكـم الـشـجيـع الكنق خيال الكحيله

الـعـدو مـاضـي وحــاضــر فــي مـلاقـانـا نبيده
والـخـوي فـي ظلنا ما يـشـتـكي اجروحن عليله

الشاعر بشير العتيبي

رابط الشيله اتمنا دعمكم 👇
https://youtu.be/Nrn1BrR4Rsw