ودي اجيك من التعب ثم أضمك = وتشوف أنا وشلون عايش بلياك
قربك عطر ودي من البعد أشمك = أخاف يبرد مابقى لي بذكراك
أبنثرك في عروق قلبي ولمك = وأحسسك بالحب في يوم لقياك
باقي معي أغلى هديه تهمك = صورتك كاتب فوقها مقدر أنساك
متى يزين الوقت وأكون يمك = اقلها اعرف ظروفك ودنياك
ياليتني في أنفاس روحك ودمك = أبقى معك وأعيش الأيام وياك
ياكثر ماني بغربتي شلت همك =انشد نجوم الليل من عقب فرقاك
عليك أخاف أكثر من أبوك وأمك = والله ماتلقى مثل قلبي أغلاك
مارتاح أنا من الوله لين أضمك = وأعلمك وشلون حالي بلياك