سامعك لبيك ياراعي الصوت الطروب=ليه تومي لي اببشتك وتركظ وتعدي
قمت اصيَّح للنواصر وانادي للركوب=وابذل المجهود لجل العطاوي واجهدي
نوب اقول البوش ماخوذ وانكر ذاك نوب=اعرف ان المطرقين اتحدا عنها حدي
وعقب انا اطعمت الخبر قلت ياربي تتوب=وقلت يادقات قلبي على الوضع اشهدي
مرحبا مافز قلبي لضحكات اللعوب=وعد طيبٍ يبذله صاحب الكف الندي
اثر قلب العود من لذعة الرمش امعطوب=وطافحٍ شبله بحلو الرفارف والبدي
مخطرٍ لا لدت بعينها يمه يذوب=وعن طريقه كلما شاف سنحتها يغدي
لاتقول الحظ بي بار والصاحب كذوب=والزمن واهل الحسد والعذول المعتدي
كلما تخشاه في عارضي عنك امحجوب=بس عطني للسبب خيط للدرب اهتدي
كانها بالجاه في روق فكاكة كروب=وفي حجا برقا ذرا بالزمان السرمدي
وكانها بالمال كفك عن البذل امعصوب=ربعنا لك ذخر ماهوب انا بس وحدي
وعن سوى هذا معاذي بغفار الذنوب=في سواليف المهايط هجوسي يزهدي
وكان علمك صوب والصوت مني راح صوب=ادمح الزله وسامح رفيقك يا بعدي