شبكة رواسي نجد الأدبية

السلام عليكم
قصيدة مصورة تبي لها
واحد ٍ يشيلها شيلة ٍ مضبوطة .
ههههههههههه عسى الله يجيبه

الأمر لله دام ما اشتغل
هذا النص مكتوب ...

بلمحة خاطفة وموجعة وعاصفة
دوّت بمشاعر الشاعر .......
الذي دائما ً مايكون المسكين ضحية
لنظرات العيون الحادة التي تسطي
بالقلب وتشعل حب النظرة الأولى
.
صباح النور
.
صباح النور ، ياورد ٍ زما في غصنه الممدود
صباح النسمة اللي في شذاها نفحة الجوري

صباح الفل ياغصن ٍ تلاعب به ،، هبوب النود
صباح الحب ، يابدر ٍ زها ، من شدًة النوري

صباح الطير ، إذا غـّرد بلحنه ، و العباد رقود
صباح المهرة ، اللي تنعسف والشعر منثوري

صباح الذوق ، يا طلعت رضيع ٍ ، توّها مولود
تغشّاها ، بوجنتها ،، جمال الزين ،، والحوري

صباح الود ،، ياقطرة ندى حطت على العنقود
وهلّت دمعها ،، فوق أخضر الأوراق معصوري

صباح الخير ياشمس ٍ بدت بين الغيوم السود
كماعذراءً ، زهت ، بحجابها، والجسم مستوري

أنا جيتك ، و أنا كليّ و له ، بالخافق الموعود
بتعذيب الفراق ،، وكلمتين ٍ ، تجرح شعوري

أبا اصبّح عليك ، بريحة الكادي ودهن العود
صباح ٍ بالذهب في صفحة التاريخ ، محفوري

أروّض قلبي ،اللي ، في غرامك باذل ٍمجهود
وأهّدي ، ثاير العبرة حسب عرفي ، ومقدوري

كفاني ماجرالي . من تباريح الغلا ، المجحود
سهر ليل وشقاء عين وطوال الوقت مقهوري

و أنا مع ما أقاسي من عذابي و المفارق زود
أقول إن الصبر طيّب ،، ولو هو ، زاد مخسوري

فراقك هم ، تبكية العيون ، و خافق ٍ ، ملهود
وشوفك عيد لامنّه حصل ليّ ، صرت مسروري

عذابي ، من عيون ٍ رمشها، في حده المحدود
أشوف الموت لاأغضت داخل النظرات محشوري

ألا ....! يافتنة العشاق ،، آية ربي ،، المعبود
تجلّت صنعته ، وأثني عليه الحمد ، مشكوري

أحبك ، يشهدالله ، والليالي ، والنجوم شهود
أخاف الحب ، يظهرني إلى من زاد عن طوري

عليّه حلف .! لوشافك غرير ٍ في المهد ممهود
نطق لك ، يذكر الله ، من جمال ٍ فيه مبهوري

ولو شافك ، قمر شوال ، ليلة ،عيدنا المعهود
يغيب ، و يجبر العالم ، تصوم اليوم بالزوري

محمد بن عمار