ابا اجعل لي بصرح الرواسي هنا ديوان=وعسى من يمر يكون معجب بديواني
وابا الون وجيه الورق باحسن اللأوان=لعلي موفق عند ما اختار الألواني
وابا انقل من الارشيف واللي كتبت الآن=واغلب ما كتيب بذاك لاواحدٍ ثاني
صبيح المحيا بدر خمسة عشرلابان==يسبي من يشوفه في هدب رمش واعياني

ا ياهل الكويت الله يسعد مساكم=ويجعل لياليكم مسرات وافراح
تحية بالطيب تدهن لحاكم=واخص غالينا العزيز ابو جراح
عزالله ان القلب يبغى لقاكم=لو شافكم يمكن يهود ويرتاح
اهضابنا تشكي تزايد جفاكم=وواد الرشا من هجركم عيشه اتراح
والنير لولا البعد يمديه جاكم=وعسعس لديرتكم يطري لمرواح
ووسط يبيكم والغرابه تباكم =حتى النضيم ليا اطروا السالفه صاح
هضاب القليب دموعها من غلاكم=بالليل تذرفها وتهمل بالاصباح
وانا اتفكر وش هو اللي دهاكم=رحنا ضحيه بين سارق ومزاح
فينا السبب والا السبايب بلاكم=متى القطيعه يافتى الجود تنزاح
ضاقو حبايبكم وفرحو عداكم=ياحيلة الله وين قول النبي راح
هل ربكم للفعل هذا دعاكم=وشلون يوم العرض ترجون الارباح
اسالكم باللي لدينه هداكم=تراي اخو مخلص ومشفق ونصاح
عدوكم لاتتبعونه خطاكم=وابغو رضا اللي مد موسى بالالواح

يامن لقلبٍ ليا قلنا سلا رد وبلشيا=وليا دله بالنهار اتعاود همومه مع الليل
ليا طراله بعض ما فات صاب الفكر غشيا=عنيد لاشال شيله ما تفيد ابه التعاليل
من قو ضربه ضلوعي صابني عليه خشيا=واضيع انا معه باهات وتناهيت وغرابيل
ان برين المرمسات من الجروح يبين نشيا=واظنه ادمن على كثر المشاكل والبهاذيل
ابا اكتم السر مثل اول لكن السر فشيا=ومسامعي جرحوها الناس من كثر الاقاويل
حشت شرايين قلبي هالهموم القشر حشيا=ماعاد اجمع وذاكرتي غشاها ضعف بالحيل
ابين اشيا من الضيقات فيني واخفي اشيا=واعض الابهام بسنوني ولا نقد الرجاجيل
رباطة الجاش والصمله ومرجلتي تلشيا=ومن اول اظن في نفسي ظنون امست تهاويل
والسبه اللي من الخلقه على الوجنات وشيا=تضفي عليه النواعس من هدب عكشٍ مضاليل
لو في قماش الحرير الناعم لخده محشيا=تشوف من دمه الزاكي مواري بالمناديل
ياعين حرٍ يتلتل برقعه توه وحشيا=والقد غصن الغضا ممطور في روس الغراميل
ليا بان خده ضوا برقٍ تلامع وارتهشيا=في مزنةٍ جا لماطرها مع الصفر هماليل
والعنق عنق الغزيل شاف ذيره وارتعشيا=والراس ذيل ادهمٍ شعشع امغير امع اول الخيل
ان كان زاد الصدود وطول الهجر وطنشيا=ادعو لخوكم تعمه رحمة الله يالمشاكيل