‏راحت الايام و الخاطر جزوع=‏والظروف تسوقنا ونسوقها
‏رحلة الدنيا ذهاب بلا رجوع=تحت الأرض اكثر من اللي فوقها
‏و الحظيظ اللي من الدنيا قنوع= عاقباً كل الفتن و طروقها
‏والله إني باللرحم ماني قطوع=والعهود الوافية مابوقها
‏المحبة سحر والفرقا تلوع=كم عشيقة فارقت معشوقها
‏الحياة تطوّع اللي ما يطوع=‏مثل تطويع الرعاة لـ نوقها
‏‏والرحى تطحن محاصيل الزروع=والعيون تخيل نوض بروقها
‏الحياة تخلّي النايم يثوع=والأماني من قطف زملوقها
‏الحياة أفراح واحزان ودموع=والأمل نور الحياة و ذوقها
‏تختلف روس الرجال من التبوع=والرجال تبين من منطوقها
‏بالسلوم وبالمذاهب والطبوع=دبرة الخلّاق في مخلوقها
وعادة الحاسدمن الطيّب بشوع=يحسده في لقمته لايذوقها
كثرت عفون العرب من كل نوع=سمِّها ببطونها و شدوقها
مايبونك في سما العزة طلوع=والقوافل مافيه شي يعوقها
الله أعلم وش ورى عوج الضلوع=السراير في بطن صندوقها
الردى له سوق تنصاه التبوع=و المراجل له أهل في سوقها
النخيل اللي لها تمر و فروع=طيّبة في طلعها و عروقها
والأثل لو له عروق و له جذوع=مابه إلا الدود يرعى عذوقها
الحياة دروس و الفجعة تروع=بكرة الأيام تطوي طوقها
السنة مثل الشهر و لّا السبوع=والاوادم مالحّقت ملحوقها
أمس يوم السبت و اليوم الربوع=ماسرع من غيابها إلّا شروقها
أطلب الله في صلاتي وبالخشوع=كان ضاقت بي جميع طروقها
الذنوب كبار و الوالي شفوع=لو وصل ذنب البشر لحلوقها

يامرحبا اعداد همال الأمزان =وعداد من طاف ودعى بالصلاتي
وعداد من غنى على الغصن طربان=بلبل يعيد بصوته الذكرياتي
والشعر يطربني إلاجاك نشوان = حلو المعاني تنتشي وسط ذاتي
وانتي لها يابنت منبع وسلوان =قافك على قلب المشقى دواتي
بنت الاكبار اطربتني بقيفان = واللي جذبة القاف سوى اسواتي
لاهمني عازف ولا كان من كان= ولا العاصفة واللي وراها يحاتي
انا مع القيفان اسرح وطربان = اقولها وانا اعلاج العصاتي
واللي نواه الطيب يسلم بليهان= اسعى معه بالطيب لوهي حياتي

يا مغنيه للقاف للسجن سجان=وانتي سجنتي خيلنا المسرجاتي

لو طبن البيدا غشا الارض دخان=شبهتهن يوم ادبكن مفرداتي

الورد ما يذبل لو اسقاه الانسان=وياليت ما جابت لنا الامنياتي

وانا ولو ماني على الفلك ربان=اغرف من الاعماق عذبٍ فراتي

الين ما يشعاني النور لا بان=ما هو بنور الارض نور الفتاتي

اللي تثور وسط الاعماق بركان=وتخلي اللي ما يحاتي يحاتي

ويا حزبنا ما كن فالارض سكان=راحوا عقب ضربات حزبي شتاتي

مهره ومسجونه وناصر وغزلان=وعازف على الاوزان صد الغزاتي

ومدمر الاحزاب مع طير حوران=راحوا ضحية سمعتي قبل لا أتي