هلا يامرحبا بطيرن من البارح ذبحه الحوم=وطيور الجو نعرفها ونعرف زين لــ اسماها
بعد ماغبت قلّي وش حصلّك ياحلال القوم=وعطني موجز النشره من اولها ليا اتلاها

يدوم الك البقا والعافيه فوق الجميع تدوم =تعرف طيور بسماها وبعيونك تحلاها
نغيب نجوم في صدر السماء والاّ نبين انجوم=تبي تسمع علومي عطني اعلومك من اقصاها

اعرف انك عطاوي ً شنب منته بشبل رخوم=تسماّ بالحرار الشقر وافعالك تعداها
نشدتك وانت تنشدني لكن مالك عن المقسوم=ليامنك جحدت السالفه بكره لقاناها

تسوم السلعه الجزله وحنا اللي فرقنا السوم =ليا دليت دلوك يالعطاوي جيت بملاها
تبى تزين العلوم وينشرح خاطرك يالزيزوم =بعد ماجاتنا النجلاء ودلتها بيمناها

تقوله والعلوم الاوله جا من بعدها علوم=واعرف الطير لو وقته يطيعه كان سواها
لنا اعراف وتقاليد ولنا عادات والنا سلوم=مانقلط عند من حطت بوسط الكف حناها

ياغشام السنه هاذي سنة خير ومطر وغيوم.=سيوفك لاتحركها لياضاقت بها خباها
تذم اخت النشاما وانت اخوها اللي ماغيره توم.=وتنكر عزوت اللي مايعقّب راي لرياها

ياليتك بس تقضيها يابو ساره صلاه وصوم=تهقوالك هقاوي ً كايده منته بوياها
تبا تغيّر لمجراها لكن فاتت وصح النوم=انا ما اذمهّا وامدح لها وامدح لشرواها