|
قــم توقّــى العوسجيـــة لا تقـــدّ المفـــردات
شوكها الظّامي يخزّ من الجفا طرف الهجير مــن تلــولس في هدبهـــا يتلفنه الشّربكــات إن نتع معنــاه مــدمي وإن تعقّب يستجــير جرهديّ الدّرب يضــمر بالحنايـــا همهمــات مــا تخطراها حـــرير ولا تثنّاهـــا حصيـــر من يذيّر بالحروف العاصفـة صمت الفــلاة ما درى يالحرف بانك من سمـا المعنى مطير يستكنّ بجيــد فكــرك مــن خيال المترفـــات عسّجديّاتٍ شفقهـــا يطفــي الحـــرف المثيـــر أتركها لمن يكملها .......... |
الله ياحمد صح الله لسانك مليون ولا يسدون ولاهان راسك وبيض الله وجهك يالقرم
طبعا اقول الخال نعم خوال ابوي الحنانيه ويشرفني اصير لكم بناخي هماليل والله اني ابا اكمل ابياتك حتى لو اجيب 4من10 الليله انشاء الله وانا والله مشتهي واحد بس شكيت بظروفه هالايام ههههههههههههه ولي عوده ان شاء الله ابو بندر الملكه اللذين واللواتي مرو من هنا حياكم الله والله متصفح ولا اروح بس يحتاج تفعيل لو بالاسبوع الله يخلي لنا هماليل بس ان ذكاي ما يرقى لفهم معاني ابياتها هههههههههههههه |
مجاراه وليست تكمله بمعناها الصحيح وعلى شان ماتحكمون علي بالغبى ما ودي اقول مافهمتها بالحيل ههههههههههه
ياهماليل الحروف الكايفات المبهمات=لو نزلتي دور من مبنى التعنت وش يصير إي نعم كلٍ له بنهجه ومفهومه سمات=ناس موردهم بحر واقوام يردون الغدير ومن تمادا في صعود الشامخات النايفات=تنحسب له /بس مجلاسه بقمتها خطير لو تثبت كذبة اللي قال لي مافات مات=لفرش حياض النخل للي يقررها حرير مره لساني من الضيقات ينشب باللهات=ونوب احس اني من الضيقه لقيت لسان غير |
الله يعطيكم العافية ولا هنتم
|
صح لسانك ملايين
شاعرنا الجميل الهواوي مبدع وجزل من يومك |
اكملي ياهماليل كان ودك ههههههه
ـــــــــــــــــــــــــــــــــــــــــــــــــ يابحر موجك هجده موج الاشواق=اعتا من امواجك صخب موج شوقي يابحر بالي له كذا شهر ما راق=وخذت رغم اني عتيبي وروقي الهجر واللي صخرك صعب ينطاق=والبعد لسباب المواصيل عوقي من حين تغرق في بحراها للاشراق=احيان ما يلتذ بالنوم موقي وين شاعرة نجد تكملها اذا ارادت هههههههههه ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ اسكن هبوب اتقر خضر الجرايد=يمكن عليها تزعج الصوت ورقا وتشجي هجوسٍ للتماثيل رايد=يبرد بها اعصابٍ من الوجد حرقا ليا عن له ماضيه جاب الفرايد=بهيفا شناح اسهيفت الخد طرقا عن وصلها حالت حظوظٍ قرايد=ومن فقدها دايم والاحداق غرقا |
الله الله
صح لسانك يابو عبيد مبدع مبدع الله اليظرك ننتظر هماليل وشاعرة نجد |
السلام عليكم ورحمة الله صحت الالسن جميعا
ننتظر تتمات الاخوات والابداع المؤكد مايهد الضلع وقعك ياهبوب السافي =ولايضر البال غيبه ماهي بمحسوبه ولا يجدد جرح قلبي كود هجر الجافي =ذاك منهو من نساني واتقى بدروبه يوم روح ماذكرني والسنين عجافي =واتقيت اجر رجلي عنوةٍ مغصوبه ليت خافي ذالنوايا يابشر ينشافي=كان ماكثرت الخطاوي يوم اوجه صوبه دون تحديد |
صح الله لسانك ياحمد وحياك مولاك
اهلا بمن مر من هنا وليت جرح الحب يلقى له طبيب ورافي=وله تناضخ عكسي مفلتر يحلي شوبه وللجفا لمبة نيون اتقول مهلاً كافي=المغربل لو تزيد شوي جاله نوبه كم عدا مع سوقهم لابس ومره حافي=وكم تمنى لو يتوب ولا تهيا توبه وسهله الدعوى ابتسامه في مقام اسعافي=من كريم المستحق وحلوه ومرغوبه |
اقتباس:
صح بدنك يالامير وبيض الله وجهك على هالتتمه الطيبه وصح لسانك ملايين |
الله يحفظك ياحمد وصح بدنك
ــــــــــــــــــــــــــــــــــــــــــــــــــ ـــــــــــــــ البارحه بالصدر مايشبه الضيق=واصبحت ما يطلق عليه اسم ضيقه وهالحين من قوه بدا ينشف الريق=الا ان بي كل المشاعر امفيقه واخشى المسا منه احتمل فوق ما اطيق=رفرف غراب البين واسمع نعيقه نبعٍ روي لكن تفجر ولا حيق=رغم ان للاصلاح100طريقه |
اقتباس:
صح لسانك يـ الهواوي واعتذر عن التأخير ماشفت هـ الابيات الا الليله تقبل التكمله وان لم تكن على المستوى,شعر الغزل من الشاعر اروع بكثير من الشاعره اسكن هبوب اتقر خضر الجرايد=يمكن عليها تزعج الصوت ورقا وتشجي هجوسٍ للتماثيل رايد=يبرد بها اعصابٍ من الوجد حرقا ليا عن له ماضيه جاب الفرايد=بهيفا شناح اسهيفت الخد طرقا عن وصلها حالت حظوظٍ قرايد=ومن فقدها دايم والاحداق غرقا ياما كتبت لْها جديد القصايد=والحال يسرق من ضنى الهجر سرقا والشوق والوجدان والود زايد=مغرم ويطرقني الهوى العذب طرقا للذكريات اللي مضت لي عوايد=تنزل على شاشة عيوني وترقا وتضيق بي وانا وسيع البنايد=بـ .اسباب مَن مِيسَمْه فـ .القلب عرقا يالورق لاحيتك بليا فوايد=والموج هايج والسماا فوق زرقا |
اي شاعر ياشاعرة نجد يغوص لهالوالي غيرك
الا التكمله هي صلب الموضوع صح الله لسانك وبيض الله وجهك ودمتي وسلمتي ولاهنتي |
لله درك شاعرة نجد
الا والله هذا هو بيت اولب القصيد صح الله لسانك وبيض الله وجهك ولاهنتي ودمتي وسلمتي الاوله معها ابيات رايت فيها صعوبه شوي والغيتها ونزلت هذا الرد بداللها ولقيت المشاركتين بدون الابيات وزود الخير خير هههههههههههههههه |
عاد وين الناس انا ماشفت احد=ومن بدت مشروع حلو وخلته ياهجوسي معك انا احب اتحد=بذكر من ساح الفواد احتلته الوليف اللي لماضينا جحد=غادةٍ حال المشقى سلته لوفاها ماهقيت يكون حد=لنها قلبي بيدها تلته |
صح بدنك يـ الهواوي
وصح لسانك على هـ العذبه وصحت السنة الجميع ودام الحضور والابدااع,’’ |
مديرنا كان طالب بتفعيل المشاركات بكل الاقسام لكن الحاصل العكس الا اهل العاصفه ههههههههههههههههه
اهلا بشاعرتنا وصح بدنك ولاهنتي |
شاعرنا ناصر الهواوي ،
شعرتنا شاعرة نجد ، صحت الالسن ادبى منقطع النضير .. |
اكمل يالهاوي ما كتب الهواوي
ــــــــــــــــــــــــــــــــــــــــــــــــــ ـــــــــــــــ احيان الذكا نكبه ونوب الذكا مطلوب=وفن التغابي بس من يقدر ايجيده مامثل السلامه رح لاغالب ولا مغلوب=ليا افلت من فخ الهوى بالك اتعيده وقلت اللقا عقب البطا عنه طب قلوب =وفعلا زياره جابت بخافقي عيده كان اسمي مدون قبل في قايمة مرغوب=ولقيته مدون تحت(ذاشخص) شخص ما اريده معلومه ان صحت (اكمل)هالوجه الجميل الذي تفضلت به هماليل اعتقد انه بالادب العربي كان باقي بالذاكره بقيه هو الايجاز وهو ان يطرح بيت وياتي من يجيزه بمعنى يشرح معانيه ويبين خوافيه بابيات على نفس القافيه والروي واذكر مثل هالنوع مساجلات بين امروء القيس وعبيد ابن الابرص وهما جاهليان |
/
صحت الألســــن وصحت قلوبكم إبداع وإمتاع متابعين لكم |
كأن لم يكن بين الحجون الى الصفا= انيسُ ولم يسمر بمكة سامر
يقال انه سمع صوت جني يقول نعم نحن كنا اهلها فابادنا= صروف الليالي والجدود العواثر والجدود الحظوظ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ ياهيه لامنك تعيدت اكمل البيت الجديد=بعيد الفطر والا بالاضحى لو تيسر كمله الناس ضاعت في خضمات الاجازه شي اكيد=وهي من قبل ويكندها من هالوضع متململه الا الهجوس اللي دبل كبدي ومن طبعه عنيد=عكر مزاجي ما اعرف وش فيه لاضقت اعمله |
صح لسانك شاعرنا (:
|
صح بدنك يارحيل
|
صحت السنكم جميع
بحور شعر ومن يبي يغوص فيكم غرق الله يطول ب اعماركم جميع ويحفظكم يارب تقبلو مروري |
/
صح لسانك يابو عبيد مليووووون واسأل الله أن يبارك لك في صحتك وجهدك ووقتك |
مسيتم بالعافيه وكل عام وانتم على ماتحبون
، البارحه يوم عهدٍ للفرح ولى والحزن فيها غدا اوضح مواريها جيت اكتب القاف ابتوسع و بتسلى لكن عين الشقا هلت عباريها على غريرٍ نهش روحي وماخلا ماغير شلفا وسقمٍ من مواطيها لمن اراد التتمه المجال مفتوح |
/
الله يمسيك بالخير والرضا يا حمد وكل عام وأنت على خير ماتحب وصح لسانك شاعرنا ع هذه الرائعه يالجزل لاهنت ولا هان منطوقك |
اقتباس:
، |
اقتباس:
لكن الاقدار عيت قمت اجاريها أشد حبل الرسن وتلني تلا وقمت اتنهت واسوق الرجل اباريها لو لوحولي وكلن رحب وهلا ماكني اشوف غير الي اداريها محاوله بسيطه |
البارحه يوم عهدٍ للفرح ولى
والحزن فيها غدا اوضح مواريها جيت اكتب القاف ابتوسع و بتسلى لكن عين الشقا هلت عباريها على غريرٍ نهش روحي وماخلا ماغير شلفا وسقمٍ من مجاريها اقتباس:
اعتذر عن التقصير بالقافيه لم اتنبه الا مؤخرا تم التعديل كل الود والتقدير للجميع |
صح بدنك ياحمد والإبداع انت منبعه طال عمرك
ولا جاء منك قصور يالذيب ابيض وجه |
حمد الحربي & قرناس الحرار
صحت الالسن ابدعتو لله دركما .. |
اقتباس:
والإبداع انتي منبعه |
اقتباس:
الهاجس اللي ماجلبلي في حياتي مايفيد =الله ُ اكبر ياعرب وشلون انا بهمله وهو الذي دايم معي وازريت القى له ضديد=شيءٍ يوسع خاطري ويزمني وازم له وشلون ابسلا ياعرب وشلون ابلقى مايبيد=شيءٍ توطن بالحشا وازريت لا أتحمله يابو عبيد الله وكيلك كل مايبرى يعيد=مثل الهموم اللي بكبدي بالغثا متجمله سنه وسنه ورا سنه للهم بالخافق بريد=متزاحمه فيه الرسايل والهموم مصمله هذي التتمه يابعد راسي وعذرا لامزيد=الضيم خيم فوق كبدي والسعد م اهتم له |
حمد الحربي الله يرحم اللي عقبوك يالغالي مبدع الله لايضرك انا ما ادخل في رمضان واعتذر عن التاخير
قرناس الحرار صح الله لسانك شيخه حييتي مرحبا يارحيل مادخلت الا الان هنا فالمعذره من الجميع ــــــــــــــــــــــــــــــــــــــــــــــــــ ــــــــــــــــــ ارسلت لي صورة البدر وافهم وش عنت=ياحمد ياشيب قلبي ورمشي وشنبي لو فهمته كان تشهد عليها انها جنت=جرم في حقي ولا اظنها كانت تبي ساعة الصفر لمدى الصبر عندي دندنت=كل ما اقدر قوله اسب شيطان الضبي ارحبي ياطلة الغاليه ياللي بدت=من يشبه في محياك ما ارسلتي غبي |
اقتباس:
انت معذور ي بعدي وعسى الله يتقبل منا ومنك صالح الاعمال والنيات والله يثبت لك الاجر يابو عبيد وصح لسانك على الطيبه ولا هي غريبه عليك هالابداع يابو عبيد |
ناصر الهواوي
حمد الحربي ابدعتو ي الأمراء وصحت ألسنتكم من يجاريكم ي المحيط الهادي والهندي بحور شعر ماشاء الله تبارك الرحمن عليكم دمتم بخير وتقبلو مروري وقسايمي |
ناصر الهواوي & حمد الحربي
صحت الالسن ودام هالابداع والتميز |
عانوني عدلت الغلطه يوم ماعدلتوها بالشطر الاول من البيت الاخير ههههههههههههههههه
لاهنتم يابعدي |
بعبد الله الصقري وقرناس الحرار=وباللي حضر يامرحبا ماهل ديم وماطير وقع عقب مارفرف وطار=وماجظ قلب وما اكتوى في ود ريم حاولت اقلد صمتكم عدة مرار=ويصير لي بعيونكم صورة حكيم واثقل واجي مثل الشواعير الكبار=قافه تقول ايتل من صدره بسيم ومحاولاتي كلها طارت غبار=وخط العقل والهجس عيا يستقيم |
| الساعة الآن 06:42 PM بتوقيت السعودية |
Powered by vBulletin® Version 3.8.7
Copyright ©2000 - 2026, Jelsoft Enterprises Ltd.Almuhajir