قصايد للنقد

[محمد الغنامي]

السلام عليكم
شعراء رواسي نجد
هذا الشخص حاب انه ياخذ رايكم في شعره بدون مجامله
ويطلب توجيهه بكل ذمه وامانه
ويسالكم بالله عدم المجامله
لانها تحديد مصير
.................................................. ......................

حطيت من قدرحبي وجازيته بالهجرآن ~
وصديت عن قربك ومنعت عنك أشوآقي ..

ولاجيت تبي قلبي ترآه مشيد البنيآن ~
ونهيت القلب عن وصلك وغرآمك الشآقي ..

ماعدت أنا أذكر درب الوصل والعنوآن ~
منعت الوصل عنك ومحيتك من أورآقي ..

..........


إن به خيرن يستآهله إنسآن ~
عآزف الحبوب طيب النيه ..

شاعرن مبدع وجزلن بالألحآن ~
والبيت عنده بقافيه ووزنيه ..

يا مسندي على مر الازمآن ~
جعل كل من عدآك للفنيه ..

ماهمني هرج عاذل ن تعبآن ~
مدحي فيك من بآب الأخيه ..

اخو نشمي والسابع لغزلآن ~
واعتزبك بكل روحه وجيه ..

بجيتك القلب دوم فرحآن ~
يقهويك الغلا دله شآذليه ..


.......................

عزفت لحن الصبر والقلب بآنت خوآفيه ~
والوجد اللي ذبح خافقي بروحه وجيه ..

لاجيت أبنسآهم وأطوي كتآبي وأخفيه ~
تمر بي الذكرى وتقرأ كتآبي عليه ..

ماعاد لي حيله غير أبتعد عنه وأجفيه ~
وأنسى زمآن ن ضآع من بين إيديه ..


.................

منوره يا غنج السجن وزوايآه ~
يا بنت الاجواد الكرم عندنا تلقينه ..

حزبك من بخله شح عنك يمنآه ~
آخذي من عشاالمهره وفكرك لاتشغلينه ..

عندنا الكرم حاتمي زايدن عطايآه ~
اكلي وابشري بسعدك ونومك لاتهملينه ..


,,,,,,,,,,,,,,,,,,,,,,,,,,

علامك رافعه السور بسياج ~
ترى سوركم بناه من طين ..

لدي النظر حزبكم كنه الميراج ~
سراب ن تحسبينه ماء عين ..

صابكم منا صداع ن وارتجاج ~
وان بغيتم اللعب على مين ..


.....................................

يامحمد خلك فطين وذكي وفهمآن ~
العود يبي قيفان بداخلي مسجونه ..

حطني بالواجهه في ساحة الشجعآن ~
لاجل أصيغ البيت ويبان مكنونه ..

ابي اجاري الشعر وأماشي الاوزآن ~
علني اصبح شاعره مبدعه ومجنونه ..

وقرون الهواوي على راسه تيجآن ~
ماتنكسر لو كلكم يالشعآر تهجونه ..


هذي مشاركات ان شاء الله نقدكم يكون فيه فايده وتوجيه مفيد

[عايض العتيبي]

والله مدري وش أقول فيها يامحمد
هذي على قولة الشيباني ..ماينهرج فيها هههههههههههه


على العموم أبا أقول رايي فيها ,,وعلى ما قال من طلبك منك الرآي دخل معك فالذمه
هناك شرطين أساسيين للقصيده بدونهما لايطلق على النص اسم قصيده ..بصرف النظر عن جزالة القصيده من عدمه
وهما الوزن والقافيه ..والوزن هنا مفقود .ولاكن مع الممارسه واخذ راي أصحاب الخبره في هذا المجال والعمل بتوجيهاتهم
قد يغير كل شيء فالمستقبل .فكل الشعراء الكبار بدايتهم كانت متواضعه الى حدٍ ما .ولاكن مع الممارسه وصقل الموهبه استطاعوا الوصول الى ماهم عليه الآن .فكل شيء كبير بدايته كانت من ضعف
عموماً هي عباره عن محاولات بسيطه . لاترقى لمستوى القصيده .. وقد يكتب لصاحبها النجاح مستقبلاً

[عازف الشوق]

وانا بعطيكم راي في الموضوع وبكل حياديه بغض النظر عن منهو الشخص المعني في طرحك ي محمد ومثل ماقال عايض شيئان اساسيان في القصيده الوزن والقافيه وهنا انا ارى ان الوزن يفتقد في بعض الابيات
ولاكن القافيه موجوده وهذا تحصل مع كل شاعر في البديات ولاكنه مع الممارسه والنقد يتعدل وضعه بذن الله وهذا الشخص انا اقول انه شاعر مبتدي ومع الوقت رايح يبدع لان اللي ماهو شاعر لو تطلب منه بيت واحد لايمكن يصلحه لك لاكن اللي عنده طموح ويجيد القافيه والرد حتى ولو افتقد لبعض الوزن انا اسميها محاولات شاعر مبتدي
وكلنا بدينا من الصفر وكان عندنا اغلاط في البديات وحصلنا من ينتقدنا ويوجهنا حتى اكتملت شاعريتنا وتمنياتي للجميع باالتوفيق

[رحيل]

انا والله لا شاعره والا ناقده لكن اشوفها رائعه ،،
واكيد الموهبه ذي مع الممارسه والعزيمه والاصرار راح تتطور .
بتوفيق يارب

[ناصر الهواوي]

انا اوافق الاخوان واميل لما قاله عازف بشرط
ان اخينا لياكتب ابيات ليست اللي تطرح بشكل تلقائي اقصد ليا اراد كتابت ابيات يعرضها على من يميل له من الشعراء
ويوجهه لمواطن الخطا بهالطريقه سيختصر الوقت لصقل موهبته
واذكر اني جاريت بعض ربعنا محاوله مني ان ينتبه ويعدل ويستفيد لكن يبدولي انه لم ينتبه لما اردت

[محمد العواد]

بالنسبه لي انا بعد ابو جزاء وعازف وابو عبيد
ماعندي شي اقوله سوى إضافة بسيطه وأعني
بها كل شاعر مبتدئ أتقن القافيه ولم يتقن الوزن



((الوزن أو البحر بأبسط مفهوم هو لحن القصيدة))



معنى ذلك يجب أن يكون للقصيده لحن صحيح وثابت
يركب على أبياتها من أول شطر إلى آخر شطر بسلاسه
دون اي خلل او نشاز ليقال عن القصيدة موزوووونه



كيف أختار اللحن الصحيح؟؟



((الذكاء مطلوب حتى في الشعر))



بالامكان الإستعانه ب أي لحن يكون سهل ومناسب لك
لأي شيلة من الشيلات شرط أن تكون على أبيات
من شعر النبط وهذا شرطٌ أساسي وجوهري
كونك شاعر نبط



أختر مثلاً أي شيلة اعجبتك لأي قصيدة
من قصائد الشاعر عبدالله ابن عون
أو المرحوم رشيد الزلامي أو غيرهم من كبار الشعراء
ثم ابدأ نظم القصيدة شطر شطر على لحن هذه الشيلة
والذي اخترته وحفظته واتقنته في قرارة نفسك....



هذه الوسيلة من أبسط
وسائل اتقان الوزن وأفضلها




أتمنى التوفيق للجميع

[ريوف]

السلام عليكم ورحمة الله وبركاته .. كييييفكم يالرواسي ...وحشتوني... كنت داخله السجن فشفت الرابط...وحبيت أعلق...

بداية .... الابيات تنبأ عن بداية شاعر او شاعره
اذا الاحساس موجود والقدرة على التعبير موجوده فالباقي يمكن صقله بالتعلم
والوزن في البدايه يكون بطريقه سهله وهي التلحين .. يختار لحن معين ويكتب عليه
جميع الابيات...اللحن يخلي القصيده سلسه ..وموزونه
طبعا مش لحن من عقله..لحن اغنيه من اغاني المطربين الكبار اللي يغنون للشعراء المبدعين مثل الامير خالد
الفيصل والامير بدر بن عبد المحسن
في بدايتي كانت ابياتي غير موزونه ولما اتبعت هذي الطريقه ..
كانت جودة القصيدة 80 % مع استشارة بعض الشعراء ومراجعة قصايدي صرت اطرحها دون تردد
طبعا تعتبر نسبه عاليه... في البدايه

فمثلا... اغنية محمد عبده ..الا واشيب عيني يوم قالوا لي فمان الله

كتبت على لحنها قبل آعرف الاوزان وطلعت مضبوطه 100%
أنــا مــدري الــوم الـنفس ولا الـوم غـدرك بـي
تكفيني الجروح اللي إيبست والشوق يدميها..... الى اخر القصيده

وكتبت على نفس اللحن بقافيه مختلفه..



انا ماجيتك آتحدى ولا جيتك جفا او صد
انا جيتك ابي جرعة حنان إداوي جروحي.....الى اخر القصيده
طبعا بعد التعلم تديجيا ..
عرفت ان هذا بحر الشيباني
وتفعيلاته..
مفاعيلن مفاعيلن مفاعيلن مفاعيلن ***** مفاعيلن مفاعيلن مفاعيلن مفاعيلن

وهكذا.... حتى تعلمت بعض البحور وكتبت عليها وعرضتها على الشعار
قبل طرحها... والآن .. اتعلم باقي البحور على التفعيلات وتقاطيع البيت حسب
الحركه والسكون.. ولله الحمد في تطور وتعلم

هذي تجربتي.. كتبت نبذه منها للإستفاده ..
وصاحب او صاحبة الابيااات يجي منه اذا اشتغل على حاله


وفاله التوفيق...

تحياتي للجمييع
ريوف القوافي