رائعه من روائع عبدالله بن زويبن

[يوسف عبدالله الغنامي]

أن كان تنشد عن علومي وأنا صبي = أبتذكرها وأعلمك عنها
لوهي بصفحاتٍ طواها الزمن طي = جرة مطر جاها عجاج ودفنها
ألعب طواريق الهوى مع هل الغي = أثقل المعنى وأخفف لحنها
والشعر يبقى في قلوب العرب حي = ولاكل من سوا القصيده تكنها
وأنا حداها حدي الاصعاب بعصي = وأقودها قود الاديب برسنها
والحب مردوده على صاحبه سي = كم ضحكة ونات قلبي ثمنها
أذكر سنة تسعه وتسعين هجري = الف وثلاثميه بدايت زمنها
زلت بي الاقدام للشمس من في = أقدار والاقدار تومر وتنهى
غافل وجتني من كوت خافقي كي = كية عطب لولا طبيبٍ مكنها
صديت مضربها عن الصدر بيدي= ولدت على كبدي برمحٍ طعنها
وعرفت ماتخفيه من نظراتها لي = من واقع النظرات مني ومنها
نظرت فيها مثل نظراتها في = وعجزت أقاومها وصديت عنها
كل النساء ظلماء وهي بينهن ضي = غطت شعاع الشمس أشعة بدنها
من الذهب تلبس خلاخيل وحلي = سودٍ محاجرها وحمرٍ وجنها
مدري تسمى من ومنين ومن أي = وش هي قبيلتها وموقع سكنها
راحت ولا أعرف من أخبارها شي = الا رموز الموتر اللي حضنها
مدينةٍ من بين ابو ظبي ودبي = لعلها كاننها هي وطنها
تمطر عليها السحب هذي ورى ذي = وديمٍ ليا قفى تراها ودنها

[محمد الروقي]

صح لسااانه

وصحة يمناك الي جابت هالدره

تقبل تقديري يابو عبد الله

[محمد القسامي]

ياسلام

يوسف بيض الله وجهك على النقل الرائع والعذب لأبن زويبن

وعلى إختيارك للقصيده الرائعه بما تعنيه الكلمه

سلمت يمينك ودمت في خير ومعزه

[خالد الغنامي]

الله الله

يوسف مشكور كل الشكر على هذا النقل الرائع

والحقيقة ان الشاعر عبدالله بن زويبن المعمري الحربي من الذين ظلمهم الاعلام

انا بحثت على النت لقصائد له لكن للاسف ان قصائده الموجود على النت تعد على اصابع اليد

وانا اقترح ان يوضع له ديوان كامل خاص بشاعر في منتدى الجميع رواسي نجد....

وتقبل مروري...

[الشقـــــاوي]

يوسف الغنامي صح لسان قايلها وسلمت يمينك

تقبل مروري المتواضع

[السيــ عمهوج ـف]

ياهلا وغلا نورت القسم

صح للسانك واللسان شاعرهاا


وسلمت يمينك على نقلهاا لنا

ودمت بود