طيرٍ غدى ياليتنا مالقيناه + 4 قصائد مجاراة.......

السلام عليكم ورحمة الله وبركاته

في يوم السبت الموافق 1436/5/16 كان العميد خالد محمد الهملان الحربي يقوم بتدريب طيره الذي اسماه (ذياب) في مخيم استراحتنا الواقعه على مدخل الدمام طريق الرياض وبعد ان عشاه قام بفك سبوقه. فشلع الطير واتجه الى مكان غير معلوم وكان ابو محمد رحمه الله قد وضع رقم هاتفه برجل الطير وبحث عنه في كل مكان ولم يعثر عليه
وفي عصر يوم الاثنين الموافق 1436/5/18. تلقى اتصال من احد الاشخاص يبشره بوجود الطير لديه في ديرة شفية.وتقع شفية بعد شمال عريره باكثر من 50 كم.
فرح ابومحمد بالعثور على طيره وقام باصطحاب الشاعر صادر حمود العنزي والشاعر عبدالله بن نازل المطيري. وكان التواجد في مقر المخيم حيث ترك صادر وعبدالله سياراتهم عند المخيم وذهبو مع العميد خالد بسيارته لاستلام الطير حيث طلب منا ابومحمد عبر اخر رساله صوتيه ان ننتظره بالمخيم حيث قال انه سيعود مع الطير (ان شاء الله) خلال ساعتين الى ثلاث ساعات وكنا في انتظارهم بالمخيم
وعندما تاخروا حاولنا الاتصال عليهم عدة مرات حيث كان جوالات صادر وعبدالله مقفله وجوال ابومحمد كان يرن ولا احد يجيب. وبعد الاتصال المتكرر رد احد الاشخاص وعند سؤاله اين صاحب الهاتف اجاب بانه حصل لهم حادث انقلاب بين عريعره وشفيه وانتقل الى رحمة الله خالد وصادر بينما عبدالله مصاب اصابه خطيره
صعق جميع من كان بالمخيم
وبعد انجلاء الصدمه اتفقنا على طريقة ابلاغ ذويهم باسلوب مناسب وذهبوا لاداء مهمة الابلاغ بينما بقيت في المخيم وكتبت هذه الابيات.
لذا ارجوا عدم الانتقاد لمعاني القصيده حيث خرجت في لحظة ذهول ولم اجد احد ازيح عليه العدوان سوى هذا الطائر النحس رغم ايماني بالقضاء والقدر
وبعد ذلك ارسلتها الى الشاعر احمد السراد الخثعمي والذي قام بمجاراتها وبعد ذلك انتشرت عبر وسائل التواصل الاجتماعي وقام بعض من الشعراء بمجاراتها

واليكم القصيده وقصائد المجاراة
..........
هذه قصيدتي

طيرٍ غدى ياليتنا مالقيـنـاه = ليت الهبايب ابعدن في مطيره

ليته تعدى الحد وابعد بمرماه = وعدى ورى بغداد وارض الجزيره

طير النحس حلفت انا لتوطاه = واحوس لو جا للمخيم مريره

والله ﻻنتف كل ريشٍ تعلاه = واسمل عيونه لين تصبح ضريره

وحلفت لخلي الحصاني تعشاه = واحط له عند الصقاقير سيره

مرحوم يامن باسم اذياب سماه = اذياب خلى نفوس ربعي حسيره
............................

مجاراة الشاعر/ احمد السراد الخثعمي

طيرٍ غدى من صاحبه عقب عشاه = ماهوب كيفيه. .جاه يمه نذيره

جاه النذير اللي على الحـق وداه = وداه.لارضٍ كان فيها مـصيره

كنه يقول..الموعد هناك تلقاه = وخذ صادر إبن حمود ماريد غيره

وراحو على داعي حكيم ن عبدناه = وهناك لحظات الحياة الاخيره

لا يالعريفي ... لاتزيد المعاناه = وحزنٍ سطا باقصا الحشا لاتثيره

قلبي شلع وارتاع من حر ماجاه = صادر غدى وابو محمد وطيره

..................

وهذه مجارات الشاعر اللواء / ضيف الله بن نايف الذويبي

لا لاتطير يازميلي وتشناه = الطير سبه والسبايب كثيره

لو تنتفه لو تسمله ما استعدناه = الحكم لله والليالي قصيره

ماله غريمٍ يالعريفي وننصاه = ناخذ بثاره في بواتع شطيره

الموت حق وكل نفسٍ تحراه = ولافيه شخصٍ عارفٍ وش مصيره

صادر وخالد تحت رحمتك يالله = تلطف بهم عند السؤال ونكيره

الحزن ماينفع ولو كثر ببكاه = لو سيل الوديان وايضا محيره

يالله يارب المخاليق يالله = تجعل لهم جنات عدنٍ وفيره

والصاحب اللي صار وقت المعاناه = ثالث ثلاثه من مصابه تجيره

عبدالله النازل تحرسه وتاقاه = وتقومه بالعافيه من سريره

وابشارة العجمي لها وقع ماحلاه = وقعٍ على قلبي سواة المطيره

يفرح بها المسلم ويصعد بها جاه = والله بها ياقاه لاهب سعيره

بشارة العجمي : اتصل احد الاخوان من قبيلة العجمان والذي تواجد في مكان الحادث اثناء وقوعه حيث قال انه حضر اولا عند صادر ووجده ينطق الشهاده وفاضت روحه ثم ذهب الى خالد ويقول انه رفع راسه وابتسم وفاضت روحه ( وانا والله كشفت عن وجه خالد بعد تكفينه وكان وجهه اقرب الى الضحك منه الى الابتسامه)

........................
وهذه مجاراة الشاعر/ مدلج بن عوض الشيباني

غنا العريفي واحرق القلب بغناه = زود على قلب المشقى سعيره

يشكي على فرقا خويه وينعاه = ويدعي عسى رب الخليقه يجيره

مرحوم ياللي كل من جاه يلقاه = رجل المواقف والامور الكبيره

خالد محمد جعل في عدن مثواه = يالله عسى جنات عدنٍ مصيره

اطلق سبوق ذياب لوح وعشاه = وكفخ قبل لايقضب الوكر سيره

وبدا على راس الطويله وناداه = لكن طيره مسرعٍ في مطيره

قفى وصلفات الهبايب تقفاه = كنه يقول لصاحبه ذي الاخيره

كنه يعرف ان القدر حان لقياه = والله عليم بخافيات السريره

والعبد يومن بالقدر مثل ماجاه = يرضى بقدر الله شره وخيره

يالله عسى الجنه مقره وملفاه = ياوحدٍ مانعرف اله غيره

....................
وهذه مجاراة الشاعر / عايد بن مهدي الوهبي

اليوم ثالث مونس الجمر واكناه = عيت تروح من الضلوع السعيره

جيت الثميري ثم زبنت الموساه =لا بردوا قلبي ولا اطفوا فليره

النوم عاف الرمش فاته ولا جاه = وعفت الوساده والتخوت الوثيره

يامن يرجع زحلنا واحلالاه = من هو يسوي بالنشاما بريره

ياليت ينفع في مثل غيبته جاه = وفعل السواعد والسطر والذخيره

والله ليومي كل وافي بشلفاه =من مركز العاقر لجال الزبيره

وتفزع رجالٍ بالطواريق تنعاه = وقفة وفاء جزله ولو هي قصيره

غنا بها احمد واوجع احمد وجاراه = الله من حبال الليالي يجيره

الذيب يلقا ذيب بحلاه وعواه = وراس ابن عمي بالمدايح جديره

الله كتب يومه وقدر وناداه = راح وعلى البيضاء نهاية مسيره

ربه دعاه وجل ربه تولاه = لا فعل شيهانه ولا فعل جيره

عساه بالجنه ومن كان وياه = ووجيههم من رحمة الله منيره

والله يوفقنا لخيره وتقواه = اجمل مافي بنادم بياض السريره
......................

وبعد يومين ذهبت الى المخيم وكانت سيارات صادر وعبدالله في لايزالٍ في مكانهن عندما ركبوا مع خالد بسيارته لاحضار الطير وتركوهن عند المخيم
فقلت

جيت المكان وشفتهن واقفاتي = وسفي الرمل بين التواير له اثار

وقفت اطالعهن وهن صامتاتي = صمتت يتيمٍ فارق الاهل والدار

ومن الغلا غطيتهن في عباتي = اخاف يلفح بديهن شمس وغبار

الله يتغمدهم برحمته ويشفي ثالثهم الشاعر / عبدالله بن نازل المطيري

احمد بن عبدالرحمن العريفي
(نديم المجره)

صح لسانك يانديم المجره
ابيات حزينه واليمه
لاهنت على الابيات الجزله
ومجارات رائعه من الشعراء
يعطيك العافيه
الله يرحم موتاكم ويشفي مصابكم
تقبل مروري واحترامي لك
المهره الاصيله

نديم المجره

ياهلا والله وغلا

والله مدري اقول صح لسانك ولا اعزيك في فقدان ربعك
الله يرحمهم ويغفر لهم جميع
ويقوم عبد الله بالسلامه
والطير ماله ذنب في اللي صار هذا جعله الله سبب انهم يروحون على شان يجيبونه
وتقف ساعتهم في موقع الله كاتب انهم يموتون فيه
سبحان الله اللذي جمعهم وكتب ساعتهم وحده ومكانهم واحد
نديم المجره
اتمنى ان اسمع
قصيد لك في غير هالموقف المحزن
سلمتي ولاهنت

انا لله وانا اليه راجعون

الله يرحم المتوفين ويشفي المصاب

( وما تدري نفسُ بأي ارضٍ تموت إن الله عليمُ خبير ) صدق الله العظيم

عظم الله اجركم يابو عبدالرحمن وصح لسانك ملايين

وصحت السنة الشعراء الذين جاروك بالمرثيه

دمت بود وتقدير

وتستاهل ال5نجوم

آنا لله وآنا اليه راجعون
عظم الله اجركم وآجر ذويهم وآلله يرحمهم بواسع رحمته وغفرانه
صح لسانك على هالمرثيه الحزينه وصحت السنة الشعراء
والله يشفي مصابكم ويقومه بالعافيه ان شاء الله
ويعطيك العافيه شاعرنا وسلمت ودمت ودام مداد قلمك الفاخر
تقديري وتقييمي لجميع قصايد الشعراء
النجلاء

صح لسانك شاعرنا وصح لسان جميع الشعار المشاركين
والله يرحم امواتكم ويشفي مريضكم باذن الله
دمت بود وتقدير

صح لسانك شاعرنا وصح لسان الشعراء على المجاريات
والله يحسن عزاكم ويحم مواتكم ويشفي المصاب باذن الله
دمت بخير وسعاده دائمه

صح لسانك وصح لسان الشعراء
الله يرحمهم جميعاً
وسلمت بعدد حروفك وابجديات القلم
تقبل
احتراامي