شبكة رواسي نجد الأدبية - عرض مشاركة واحدة

29-07-2017, 03:00 AM

قصه وقصيده ال فرسان عتيبه
بسم الله الرحم الرحيم

تعتبر هذه القصة من اشهر قصص البطوله والشجاعه لفرسان التنابكة من المراشدة من عتيبة بقيادة الشيخ/ ضـيف الله ابن مـدوخ ابن دخيل الله ابن سعيد ابن عبدالله (الملقب تنيبيك) ابن محمد ابن عبيد المرشدي الروقي من شيوخ قبيلة المراشده وهى قصة ردهم لإبل النفعة جماعة ابن حجنة
يقول الراوي:
كانوا النفعة قاطنين على الحفاير جهة ظلم وكانوا الحجن مسافرين لهم لزوم عند الشريف حاكم الطائف
وكانوا التنابكة رايحين مع برقا بسبب قتل احد ابناء عمومتهم من ذوي عبيد للشيخ مدوخ بن دخيل الله ال تنيبيك وكانوا يتغيبون عند برقا طلباً للثأر ويوم وردوا التنابكة على النفعة وهم على الحفاير قالو لهم النفعة مالكم ما لكن روحوا للطفية وهي للنفعة وانزفوها واقطنوا علاها وهي في فية ظلم وفعلا راحوا التنابكة للطفية وانزفوها وقطنوا علاها.

وكان عددهم سبعة فرسان ستة من التنابكة والسابع عبدهم نصيب كلهم لحمه وحده ما فيهم خلط من غيرهم وهم:

1- الفارس الشيخ / ضيف الله بن مدوخ ال تنيبيك
2- الفارس/ متعب بن مدوخ ال تنيبيك
3- الفارس/ ركيان بن مطلق ال تنيبيك
4- الفارس/ سحمان بن حزام ال تنيبيك
5- الفارس/ بجاد بن عماش ال تنيبيك
6- الفارس/ مترك ال تنيبيك (يقول الراوي نسيت اسم ابوه )
7- الفارس/ نصيب ( عبد ركيان بن مطلق ال تنيبيك )

ويوم من الايام اغار علي ابل النفعة قوم من مطير بعد ان استغلوا غياب ابن حجنه وقومه وكان عند الحلال من ضمن الرعيان بنت وهي اللي راحت للتنابكة وهم على الطفيه و يوم جتهم لينهم يتوضون يبا يصلون الظهر ولاهي متكشفة ورافعة بخنقها على راس عصاها وتنخا البل وخذت ياريجيل قالوا :استتري والبل يبا الله ييسر امرها ثم صلوا الظهر وعجلوا بالصلاة ولحقوا البل على خيلهم ولا لحقوها الا عند هكران واظهرهم الله علاهم وردوا البل ما وخذ منها شي ومعها اثنعشر ذلول من جيش مطير كسب وبعد ما رجعوا غانمين ارسل الشيخ/ضيف الله ابن مدوخ العبد نصيب الى شاعر المراشدة الكبير/ سيف بن ماضي الحكرة المرشدي ولم يكن معهم في هذه الوقعة وكان نازل على الشماس ويوم جاهم علموه وقالوا رد فيها قالهم علموني بسيرتها كلها وبعدها تمثل بهالقصيدة الملحمية:

هاض قلبي ظهر قبل أمس يوم أذن نصيب === قال جاكم صايح ستر راسه في عصـاه
ثم توضينا من الماء على جـال القليـب === ثم صلينا جماعه وعجلنـا الصـلاه
يوم جات ليا أنها بنـت ماقـد جـت بصيـب === كن حب نهودها فالنحر جمـرة غضـاه
قلنا ويش العلم يابنت والتبريج عيـب === قالت إن المال يالاد روق اقفي عـلاه
ويوم جانا صايح البل وحنا نستصيب === قصدنا قل الجماعه وكثر اللي وراه
والله إنك تزهم الرجل باسمه مايجيب === مغلقٍ درب النسم زرمةٍ مثل الحصاه
ثم لحقنا كلنا فوق عجـلات الهذيـب === واحدتهن قد طلع قرحهـا واهيـه فتـاه
زادهن الدر والبـر وغمور الرطيـب === لين صارت واحدتهن تشادي للمهـاه
ثم جاء مفزاعهن سيرةٍ وأمرٍ عجيب === يوم ياطن الدعث كنهنه مع صفاه
سبعة والكل منا علـى مثـل القضيـب === طايرٍ من كف راعيه يطـرد لـه قطـاه
سبعةٍ كم فرقوا من حبيبٍ عن حبيب === منوة اللي لاذ فيهم يبا درب النجاه
جعل ذرعانن لحقنا عليها ما تعيب === الحذا فيهن ما وحدة تشكي حفاة
يوم جيناهم ليا شيخهم أمره غضيب === مير خلانا الرمك بالحذا تاطا علاه
يوم قسمهم صليبين جيناهم صليب === جاء يبا خيبة رجانا وخيّبنا رجاه
ما درى أنا بالملاقا عمى عين الحريب === كل معلوقٍ ننوشه نجذه من عراه
كم صبيٍ طاح رايحةٍ اضلاعه حطيب === ماتثور المارت الا بعد تلمس قفاه
لين نطلان الجنائز غدا مثل الخشيب === مثل نطلان الخشب في براح أرضٍ فلاه
ياذيابة كشب والخال وذياب الجذيب === انحرن هكران عان الولايش في قداه
ثم عد الضلع ياذيب واشهر بالقنيب === لين مافي ظلم من ضبعةٍ توح العواه
أكلن الجيش المذبح وغببن الغبيب === من وراه جراه بالمجحره يدعي جراه
نحمد الله يوم صار الفرج منا قريب === ثم لطمنا عيون العناتيت الطغاه
هجمةٍ وخذت لبرقا من المظما عزيب === طامعٍ فيها حريبٍ رثعنا في شواه
هجمةٍ من عهد بادي وشباب وشبيب === هم جنبها ماتلاها الصبي ساحب عصاه
هي عدايلنا المقيمة ليا بار الصحيب === يوم كل صحيب كذبٍ يبور بمن نصاه
ياهبيل القلب حنا كفاية من يغيب === دون وبرات العشائر نرد حوض الوفاه
حشمة اللي يوم جاء الوقت تعطينا الحليب === يوم شح الرزق مطعومنا حدر الرغاه
والردي يالبيض عيفنه إن جاتسن خطيب === اذهنن راس المهبا وجوزن من نماه
لو قضا الحاجات بالليل من خذته تخيب === حيث فرخ الكندره ماينومس من غذاه
وياوجيه الخير من يقبل الرخمه نسيب === كيف يرضى بارد العزم يفزع في نساه
وخاتمة قولي صلاة على وجه الحبيب === الرسول اللي عليه انزلت فرض الصلاه

رواية: شايب من شياب المراشدة عمره فوق المية سنة من اهل الدين والصدق والعرف والحفظ يقول انه لحق على شياب المراشدة وهو صغير يروون السالفه كما ذكرها هنا وهو ليس من التنابكة الله يعطيه العافية ويحسن له الخاتمة ويرحم اموات المسلمين.

خيال ~

سبعة فرسان ع جيش من مطير هذي قويه .,

اميرة الورد ,روابي ,رحيل و 2 آخرون معجبون بهذا