يموت الرجا بالياس واثر الفرج قريب=واثرها ثمينه فرصة الوصل لامرت
توصيلة مهاتف جت جزا من سعى بالطيب=جزيله هبتها سرت بحاله وضرت
نيام الطواري كل طاري عوى له ذيب=وصار التماس بموجة الفكر وانفرت
اطفى في كلامه ساعرٍ فيِّ كاد ايذيب =حنايا الضلوع اللي من الساعر احمَّرت
لكن وش يفيد الوصل من عقب لاح الشيب=بعد ما القت بيدها العصا والنوى قرت
وانا لو فرحت بصوتٍ اغليه مابه عيب=برد لاهبٍ بالكبد لحظات واحترت
كنت بواقعي راضي لو الصبر عنه إصعيب=بما اكن اقر وهي بما تخفي اقرت
وتشاوت جروحٍ ماهقيت انها تطيب=وحصل للرياض المجدبه رش واخضرت