ترى قدرك على حد السماء يابنت لو تدرين =ولايمكن أحد يقدر يطوله لو نوى صوبه
تراك الطهر والشيمه وروعة هل زمان الشين=ولايمكن أبد نرضى عليك الهينه نوبه
نعيش الوقت في ناره يقلبنا على الجنبين =سهومه في جدار الصمت والاحلام مسلوبه
تباريح الزمن جارت وشبت في الحشا نارين =سمات الحزن في عيونن من الأيام مرعوبه
جروح العام تشقينا وحطت همنا همين =ألا يالله ياوالي يغيب الحزن ودروبه
أحد يسعى ورى رزقه ولا يدري يجيه منين =وهذاك ابلا تعب جابه تحقق كل مطلوبه
نبي هاذي مع هاذي طمعنا نجمع الثنتين =أماني لكن المقسوم لزومن يلبسك ثوبه
من صروف الدهر شلنا ولا ندري نروح الوين =مرابعنا نعيش بها علينا بسعر مجلوبه
وكلي في الرموش اللي شكت حر الدموع سنين =عسى الله يلطف بدمعه على الخدين مسكوبه
وذيبن زاد به جوعه شكا مر العنا والبين = يجر عواه في ليله بقايا العز منهوبه
تعالي ونشدي قلبن من طعونه غدى قسمين =مقادير الزمن نارن بوسط الجوف مشبوبه
أشبها مقادير الزمن لعبه على الحبلين =تعل الخافق بناره حطبها تو ماجوبه
واشوف الوقت به خله رسم وجه لنا وجهين =نوايا الخلق به شانت كثير الناس ضاعو به
ألا يالله ياوالي تعدلها من الصوبين =تعبت وشحت الحيله واشوف الحق يادوبه
ماغيرك نلتجي صوبه والحدن غيرك إلنا معين=رجاك العبد ياوالي الخلايق تغفر اذنوبه
بجودك يسعد الخافق واشوف الناس مسترين =بقربك يهتني عبدك يحصل كل ماجوبه
إلهي أنت مقصودي طلبتك ترحم المشفين =مفاتيح الفرج بيدك مغيرك نلتجي صوبه