يا زين يوم إني أنا وإنتـي صغـار=تو ما لبست شمـاغ وإنتـي عبايـه
بالطول ما ناصل ولا خمسة أشبـار=دايـم نقيـس أطوالنـا بالمـرايـه
مـا بيننـا شـيٍ نخبيـه وأسـرار=ما غير لعب أطفـال كـل الحكايـه
ما همنا موجـز ولا نشـرة أخبـار=التسليـه صـارت وسيلـه وغايـه
وإن جا فلم كرتون للقطـو والفـار=نجلـس نتابـع قصـتـه للنهـايـه
بالمدرسه نزعل على شان الأصفار=إنتي سبب لعبك وأنـا مـن غبايـه
ياما تهاوشنـا علـى كيسـة فشـار=أنحاش به وأفرح بطـردك ورايـه
وإن قلتي يا راشد يا ويلك من النار=أخـاف وأستسلـم وأبيـن خطايـه
وإلى ضربتينـي تقـل بيننـا ثـار=وإن قلت كافي قلتي ما هـو كفايـه
وإلى خلصتي ضرب بيمين ويسـار=أخذتـي الفشـار واللـي معـايـه
وإلى زعلت وقلت أبا أروح للـدار=صحتي وقلتـي آسفـه يـا غلايـه
وأصدقك وأفرح بعد ذيك الأعـذار=وأجيك لا حاقد ولا أحمـل وشايـه
بس لو أشوفك مع بشر غيري أغار=لو كان أخوي أو من أعز أصدقايـه
وأركض لأخوك أقول شفها مع كبار=عشان يفرض لي عليـك الوصايـه
هـذي طفولتنـا بـراءه وتـذكـار=دايـم نحـن إليـا ذكرنـا البدايـه
واليوم أبكتبهـا سواليـف وأشعـار=وأفكـر أنتجهـا بفلـم و روايــه