شبكة رواسي نجد الأدبية - اشرب الفنجال واكب البياله@طيب واحب سلم الطيبين

الصبي وان طاب طيبه من خواله
وان تردى فعلم انهم خايبيني

أشرب الفنجال واكب البيالة
طيبن واحب سلم الطيبيني

من لا يعرف .. هذين البيتين ..
بيتين اشهر من نار على علم ، قد لا يعرف البعض قائلهما ولكن اكيد سمع بالبيتين من قبل حتى اصبح مضرب مثل يتداوله كثير من الناس قائل هذين البيتين هو الشاعر / راشد بن حسن بن مانع بن رحيان الضاعني العجمي الملقب بــ (ابن الذيب) وقيل انه توفي عام 1986م وهو في نجران وكان شايل معه شخص موصله الى قرية (الخضراء) في نجران وحصل عليهم حادث وتوفي رحمه الله .
راشد بن حسن كان يشتغل في شركة ارامكو السعودية وكان يملك سيارة الشركة (جمس ارامكو) وكان كل ماشاف له رجلي والا طرقي على الخط يبي احد يوصله يقوم ابن الذيب ويوصله بدون مقابل وعلى سيارة الشركة حتى اشتهر عند البدوان . لا جاء احد يبي يروح مكان ولا عنده مطيه والا موتر يمشي في طريقه ويقول: عسا يلقاني (ابن الذيب) على الطريق والا انا ألقاه .
حتى قاموا الناس يطرونه ويحكون فيه وهم لا يعرفونه والبعض منهم ماقد شافه . جاء يوم من الايام وكان راشد بن حسين رايح لدوامه مستعجل وهو متأخر عن الدوام وشاف عجوز ومعها غنم قليلة تعد على الاصابع و تعداها وهملها عقب حزت في خاطره واستحى
(وراعي الطيب ما يجوز عن طيبه)
وقف الموتر ورجع للعجوز يوم جاها قالها يا مره انا ابشيلك وبوديك المحل اللي تبينه بدون غنمك انا متأخر على الدوام واخاف غنمك شيلها يأخرني . قالت له العجوز: خلاص رح الله يستر عليك يا ولدي انا جالسه هنا انتظر (ابن الذيب) ..عسى الله يجيبه وبيوصلني المكان اللي انا ابيه انا وغنمي .
وهي ما تعرفه ولا تدري انه (ابن الذيب) هو نفسه اللي هي تكلمه يوم انصدم (راشد بن حسن) بكﻻمها وتعجب !! قال اركبي يا خاله انا (ابن الذيب) وابشري بعزك ابوصلك انتي وغنمك . وكانت انظمة ارامكو تمنع السائقين ان يشيلوا الرجليه اللي يوقفون السواقين ويطلبونهم توصيلهم على طريقهم وشلون توصيل الغنم؟؟
وصل علم للشركة بفعل (راشد بن حسن) .. وهدد بالفصل من الشركة اكثر من مرة ، وبعض رؤساءه يئسوا من المحاوله معه رغم إعجابهم بشهامته المهم وصل العجوز إلى منصاها والمكان اللي تبيه .

وقال هذى القصيدة :

قالها (ابن الذيب) من هاجوس باله
كلمةٍ يلعب بها والبال زيني

قالها يومه طراله ماطراله
من هواجيسٍ تشيب المرضعيني

حالفٍ ماخذ على الطرقي رياله
وبالثلاث محرم أنه مايجيني

لالقيت اللي على (السكه) لحاله
يلتفت ويقول وين المستحيني

أوقف الموتر حيا وأبي الجماله
يوم ولد اللاش وجهه مايليني

الطمع في كروة الرجلي رذاله
خص وان جابه مجال الغانميني

والردي في حالةٍ ماهي بحاله
ياعوينه من كلام الطيبيني

الردي لو بان مايذكر عماله
مايعد اللاش مقصور اليميني

أركبه لعيون من زينٍ دلاله
ماتحاكوا في قفاه الرامسيني

مابغى غيري وانا مابغى بداله
قاعدٍ لي بالرجا مدة سنيني

الصبي وان طاب طيبه من خواله
وان تردى فعلم انهم خايبيني

أشرب الفنجال واكب البياله
تابعٍ سلمي سلوم الأوليني

ولاقعدنا بالعمل ابنا الرزاله
ناخذ العليا طريق الفايزيني

غرني بعض الرجال بكثر ماله
مادرى ان الموت في حبل الوتيني

كيف ينفعني وبعض الناس خاله
مايقوم البيت دام الساس طيني

ماش وين اللي عوايده الجماله
مثل ابن ظافر حمد ليته يجيني

الثنا والجود دايم في خياله
علمه ظافر سلوم الطيبيني

جوّد العليا ولزمّها عياله
وادركوا من علمته دنيا وديني

واهني من باع حظه واشترى له
وسار في درب النبي وأخزى اللعيني

موقفه ماكل رجال يناله
من بغى ممشاه يقعد مرتيني

كم ذبح من حايلٍ من حر ماله
وعادته لطمة خشوم العايليني

وسلامتكم

معلمومه هامه؛ الشاعر/ راشد بن الذيب هو والد الشاعر الكبير/ محمد بن الذيب